Thursday, December 2, 2010

2022ലെ ലോകകപ്പ് വിധി ഇന്ന്


ദോഹ: ഖത്തറിന്റെ ഈ നൂറ്റാണ്ടിലെ ഏറ്റവും വലിയ സ്വപ്‌നമായ 2022ലെ ലോകകപ്പ് ഫുട്ബാളിന് ആതിഥ്യമരുളാനുള്ള ഖത്തറിന്റെ മാസങ്ങള്‍ നീണ്ട ശ്രമങ്ങള്‍ സാക്ഷാത്കരിക്കപ്പെടുമോ എന്ന് അറിയാനുള്ള കാത്തിരിപ്പിന്റെ വഴിയില്‍ ശേഷിക്കുന്നത് മണിക്കൂറുകള്‍ മാത്രം.

2018ലെയും 2022ലെയും ലോകകപ്പ് വേദികള്‍ ഫിഫ നാളെ പ്രഖ്യാപിക്കാനിരിക്കെ രാജ്യത്തെ സ്വദേശികളും വിദേശികളുമടങ്ങുന്ന ജനസമൂഹം പ്രതീക്ഷകളും പ്രാര്‍ഥനകളും നെഞ്ചിലേറ്റി സൂറിച്ചിലേക്ക് കാതോര്‍ക്കുകയാണ്. ഇന്നലെ നടന്ന ഫിഫ യോഗത്തില്‍ ഖത്തറിന്റെ ബിഡ് അമീറിന്റെ പത്‌നിയും ഖത്തര്‍ ഫൗണ്ടേഷന്‍ ചെയര്‍പേഴ്‌സനുമായ ശൈഖ മൗസ ബിന്‍ത് നാസിര്‍ അല്‍മിസ്‌നദ് അവതരിപ്പിച്ചു.

എല്ലാ പ്രതിബന്ധങ്ങളെയും അതിജീവിച്ച് ലോകത്തിന്റെ ഫുട്ബാള്‍ മാമാങ്കം തങ്ങളിലൂടെ ഇതാദ്യമായി പശ്ചിമേഷ്യന്‍ മണ്ണിലേക്ക് കൊണ്ടുവരാനാകുമെന്നുതന്നെയാണ് അവസാന മണിക്കൂറുകളിലും ഖത്തറിന്റെ പ്രതീക്ഷ. ഇതുമായി ബന്ധപ്പെട്ട് മാസങ്ങളായി തുടരുന്ന പ്രചാരണത്തിലൂടെ ഖത്തറിന്റെ മൊത്തവും പശ്ചിമേഷ്യന്‍ രാജ്യങ്ങളുടെയും അഭ്യുദയകാംക്ഷികളായ മറ്റ് രാഷ്ട്രങ്ങളുടെയും കായിക സംഘടനകളുടെയും പ്രസ്ഥാനങ്ങളുടെയും പിന്തുണ ഖത്തര്‍ ബിഡിന് ലഭിച്ചിട്ടുണ്ട്.

2018 ലോകകപ്പിന്റെ വേദിക്കായി ബെല്‍ജിയം, നെതര്‍ലന്‍ന്റ്‌സ്, ഇംഗ്ലണ്ട്, റഷ്യ, പോര്‍ച്ചുഗല്‍ ‍, സ്‌പെയിന്‍ എന്നിവയാണ്‌ ഇതില്‍ പോര്‍ച്ചുഗല്‍ , സ്‌പെയിന്‍ എന്നീ രാജ്യങ്ങളും ബെല്‍ജിയം, നെതര്‍ലാന്റ്‌സ് എന്നിവയും സംയുക്തമായാണ് ബിഡ് സമര്‍പ്പിച്ചിട്ടുള്ളത്. 2022ലെ വേദിക്കായി ഖത്തറിന് പുറമെ ആസ്‌ത്രേലിയ, ജപ്പാന്‍ , ദക്ഷിണ കൊറിയ, അമേരിക്ക എന്നിവയുടെയും ബിഡുകളാണ് ഫിഫ എക്‌സിക്യൂട്ടീവ് കമ്മിറ്റിയുടെ പരിഗണനയിലുള്ളത്. ഇന്തോനേഷ്യയും മെക്‌സിക്കോയും ബിഡുകള്‍ സമര്‍പ്പിച്ചിരുന്നെങ്കിലും തള്ളപ്പെട്ടു.

തെരഞ്ഞെടുക്കപ്പെട്ടാല്‍ ലോകകപ്പിന് ആതിഥേയത്വം വഹിക്കുന്ന ആദ്യ അറബ് രാജ്യമായിരിക്കും ഖത്തര്‍ . പുതിയ ഒമ്പത് സ്‌റ്റേഡിയങ്ങളുടെ നിര്‍മാണത്തിനും നിലവിലുള്ള മൂന്ന് സ്‌റ്റേഡിയങ്ങളുടെ നവീകരണത്തിനുമായി 400 കോടി ഡോളറിന്റെ പദ്ധതിയാണ് തയാറാക്കിയിരിക്കുന്നത്. ലോകകപ്പ് നടക്കുന്ന ജൂണ്‍ , ജൂലൈ മാസങ്ങളിലെ ഉയര്‍ന്ന ചൂടാണ് ഖത്തര്‍ ഇക്കാര്യത്തില്‍ നേരിടുന്ന പ്രധാന വെല്ലുവിളി. എന്നാല്‍ ‍, സ്‌റ്റേഡിയങ്ങളും ഗാലറികളും അത്യാധുനിക സാങ്കേതികവിദ്യ ഉപയോഗിച്ച് ശീതീകരിക്കുന്നതിലൂടെ പ്രശ്‌നം പരിഹരിക്കാമെന്നതാണ് ഖത്തര്‍ ബിഡ് കമ്മിറ്റിയുടെ പ്രതീക്ഷ.

പ്രഖ്യാപനത്തോടനുബന്ധിച്ച് ഇന്ന് (വ്യാഴാഴ്ച്ച) ഉച്ചക്ക് രണ്ട് മുതല്‍ സൂഖ് വാഖിഫിലും ആസ്‌പയര്‍ പാര്‍ക്കിലും വന്‍ ആഘോഷപരിപാടികളാണ് ബിഡ് കമ്മിറ്റി ഒരുക്കിയിട്ടുള്ളത്. ഫിഫയുടെ പ്രഖ്യാപനച്ചടങ്ങ് അല്‍ജസീറ ചാനല്‍ തല്‍സമയം സംപ്രേഷണം ചെയ്യുന്നുണ്ട്.

1 comment:

മുഹമ്മദ്‌ സഗീര്‍ പണ്ടാരത്തില്‍ said...

ഖത്തറിന്റെ ഈ നൂറ്റാണ്ടിലെ ഏറ്റവും വലിയ സ്വപ്‌നമായ 2022ലെ ലോകകപ്പ് ഫുട്ബാളിന് ആതിഥ്യമരുളാനുള്ള ഖത്തറിന്റെ മാസങ്ങള്‍ നീണ്ട ശ്രമങ്ങള്‍ സാക്ഷാത്കരിക്കപ്പെടുമോ എന്ന് അറിയാനുള്ള കാത്തിരിപ്പിന്റെ വഴിയില്‍ ശേഷിക്കുന്നത് മണിക്കൂറുകള്‍ മാത്രം.