Thursday, April 20, 2017

പതിനഞ്ച് വര്‍ഷത്തിലധികം പഴക്കമുള്ള വാഹനങ്ങള്‍ ഇനി ആറുമാസം കൂടുമ്പോള്‍ പരിശോധന നടത്തണം!.



ദോഹ: പതിനഞ്ച് വര്‍ഷത്തില്‍ അധികം പഴക്കമുള്ള വാഹനങ്ങള്‍ക്ക് ആറുമാസം കൂടുമ്പോള്‍ നിര്‍ബന്ധമായും സാങ്കേതിക പരിശോധന നടത്തണമെന്ന് ഖത്തര്‍ സെന്‍ട്രല്‍ ബാങ്ക് (ക്യു.സി.ബി.).

വാഹന ഇന്‍ഷുറന്‍സ് ക്ലെയിമുമായി ബന്ധപ്പെട്ട വ്യവസ്ഥകള്‍ പരിഷ്‌കരിച്ച് ക്യു.സി.ബി. പുറത്തിറക്കിയ സര്‍ക്കുലറിലാണ് ഇക്കാര്യം നിര്‍ദേശിച്ചത്. പതിനഞ്ച് വര്‍ഷത്തിലധികം പഴക്കമുള്ള വാഹനങ്ങള്‍ക്ക് അഞ്ചു വര്‍ഷത്തേക്ക് ആറുമാസം ഇടവിട്ട് സാങ്കേതിക പരിശോധന നിര്‍ബന്ധമാക്കിയാണ് സര്‍ക്കുലര്‍ ഇറക്കിയത്.

20 വര്‍ഷം പഴക്കമുള്ള വാഹനങ്ങള്‍ നാല് മാസത്തിനിടയിലും ഇരുപത്തഞ്ച് വര്‍ഷം പഴക്കമുള്ള വാഹനങ്ങള്‍ മൂന്ന് മാസം ഇടവിട്ടുമാണ് പരിശോധന നടത്തേണ്ടത്.

ഉദാഹരണത്തിന് 2001 മോഡല്‍ കാര്‍ ഓരോ ആറുമാസം കൂടുമ്പോഴും നിര്‍ബന്ധമായും സാങ്കേതിക പരിശോധനയ്ക്ക് വിധേയമാക്കണം. 1996 മോഡല്‍ വാഹനങ്ങള്‍ ഓരോ നാലുമാസം കൂടുമ്പോഴും പരിശോധന നടത്തണമെന്നും സര്‍ക്കുലറില്‍ വ്യക്തമാക്കിയിട്ടുണ്ട്.

ഫ്രണ്ട്സ് ഓഫ് തൃശൂർ ചിത്ര രചനാ മത്സരം ഏപ്രിൽ 28 ആം തിയതി



ദോഹ: ഖത്തറിൽ പ്രവർത്തിക്കുന്ന ഇന്ത്യൻ വിദ്യാലയങ്ങളിലെ വിദ്യാർത്ഥികൾക്കായി ഫ്രണ്ട്സ് ഓഫ് തൃശൂർ സംഘടിപ്പിക്കുന്ന ഒൻപതാമത് ചിത്രരചനാ മത്സരം ഏപ്രിൽ 28 ആം തിയതി വെള്ളിയാഴ്ച്ച ഉച്ചക്ക് രണ്ടു മണി മുതൽ രാത്രി എട്ടു മണി വരെ എം.ഇ.എസ് ഇന്ത്യൻ സ്ക്കൂളിൽ വച്ച് നടത്തുന്നു.

ഖത്തറിലെ പതിനഞ്ചോളം വരുന്ന വിദ്യാലയങ്ങളിൽ പഠിക്കുന്ന വിദ്യാർത്ഥികളുടെ ക്ലാസ്സുകളെ അടിസ്ഥാനത്തിൽ ഒന്നു മുതൽ മൂന്ന് വരെ ഒന്നാം വിഭാഗത്തിലും, നാലു മുതൽ ആറു വരെ രണ്ടാം വിഭാഗത്തിലും, ഏഴു മുതൽ ഒൻപതു വരെ മൂന്നാം വിഭാഗത്തിലും, പത്തു മുതൽ പന്ത്രണ്ടാം ക്ലാസ്സു വരെ നാലാം വിഭാഗത്തിലുമാണ് മത്സരം നടക്കുന്നത്.

മത്സരത്തിലേക്കുള്ള അപേക്ഷകൾ ഇതിനോടകം തന്നെ എല്ലാ വിദ്യാലയങ്ങളിലും സംഘാടകർ എത്തിച്ചു കഴിഞ്ഞു. മുൻ വർഷങ്ങളിലേതുപോലെ പൂർണമായി വിദ്യാലയങ്ങൾ മുഖേനയാണ് അപേക്ഷകൾ സ്വീകരിക്കുന്നത്.

ഓരോവിഭാഗത്തിലും വിജയികൾക്ക് ട്രോഫികളും സർട്ടിഫിക്കറ്റുകളും സമ്മാനിക്കുന്നതിനോടൊപ്പം തന്നെ മത്സരങ്ങളിൽ പങ്കെടുക്കുന്ന എല്ലാ വിദ്യാത്ഥികൾക്കും സംഘടനയുടെ സർട്ടിഫിക്കറ്റ് നൽകുകയും ചെയ്യും.

ഏറ്റവും കൂടുതൽ വിജയികൾ ഉണ്ടാകുന്ന വിദ്യാലയത്തിന് എം.എഫ്.ഹുസ്സൈൻ മെമ്മോറിയൽ ട്രോഫിയും, ഏറ്റവും കൂടുതൽ മത്സരാർത്ഥികളെ പങ്കെടുപ്പിക്കുന്ന വിദ്യാലയത്തിന് രാജാരവിവർമ്മ മെമ്മോറിയൽ ട്രോഫിയും സമ്മാനിക്കും.

ഇന്ത്യയും ഖത്തറും അടങ്ങുന്ന പത്തിൽ പരം രാജ്യങ്ങളിൽ നിന്നുള്ള ചിത്രകലയിൽ പ്രഗത്ഭരായ കലാകാരന്മാർ അടങ്ങുന്ന ജൂറിയായിരിക്കും വിജയികളെ തിരഞ്ഞെടുക്കുക.

മത്സരം നടന്ന് ഒരാഴ്‌ചക്കകം തന്നെ വിജയികളെ പ്രഖ്യാപിക്കുകയും സംഘടനയുടെ പത്താം വാർഷികദിനത്തോടനു ബന്ധിച്ചുള്ള ആഘോഷ പരിപാടിയിൽ വിജയികൾക്കുള്ള സമ്മാനങ്ങൾ വിതരണം ചെയ്യും.

മത്സരം നടക്കുന്ന വേദിയിൽ ഖത്തർ അഭ്യന്തരവകുപ്പിന്റെയും ഗതാഗതവകുപ്പിന്റെയും മറ്റും ബോധവത്കരണ പ്രദർശനങ്ങളും, മയക്കുമരുന്നുകളും, ആൾക്കുകൂട്ടത്തിൽ നിന്നും ക്രിമിനലുകളെയും മറ്റും തിരഞ്ഞുപിടിക്കുന്ന ശ്വാനവിഭാഗത്തിന്റെ പ്രകടനങ്ങളും, കുട്ടികൾക്കായി വടംവലി മത്സരങ്ങളും മറ്റും ഉണ്ടായിരിക്കും.

കുട്ടികളോടൊപ്പം രക്ഷാകർത്താക്കൾക്കും ഉപകാരപ്രദമായ രീതിയിലുള്ള ബോധവത്കരണ പരിപാടികളും ഉണ്ടായിരിക്കും.

കൂടുതൽ വിവരങ്ങൾക്ക് 44317273 - 55535034 - 55811289 - 77773017 - 66204565 എന്നീ നമ്പറുകളിൽ ബന്ധപ്പെടുക.

ഖത്തറിന്റെ ആകാശത്ത് ശനിയാഴ്ച ‘ഉല്‍ക്കമഴ’!.



ദോഹ: വാനനിരീക്ഷകര്‍ക്ക് ദൃശ്യവിസ്മയം ഒരുക്കി ശനിയാഴ്ച ഖത്തറിന്റെ ആകാശത്ത് ഉല്‍ക്ക വര്‍ഷിക്കുന്നത് കാണാം. ജനുവരിക്കു ശേഷം ഇതാദ്യമായാണ് ഖത്തറില്‍ ഉല്‍ക്ക വര്‍ഷിക്കുന്നത്.

ഒരേ കേന്ദ്രത്തില്‍നിന്ന് ഒട്ടനവധി ഉല്‍ക്കകള്‍ മിന്നിമറയുന്ന വിസ്മയകാഴ്ചയാണ് ശനിയാഴ്ച രാത്രി നടക്കുന്നത്. ഒരേ കേന്ദ്രത്തില്‍നിന്നാണെങ്കിലും ആകാശത്തുടനീളം ഇവയെ കാണാം.

ഏപ്രില്‍ പതിനാറിനും ഇരുപത്തിയഞ്ചിനും ഇടയില്‍ ഉല്‍ക്കാവര്‍ഷം കാണാമെങ്കിലും ഏറ്റവും ശക്തമായി ഉല്‍ക്ക പതിക്കുന്നത് ഏപ്രില്‍ 22-നാണ്. പുലര്‍ച്ചെയ്ക്ക് തൊട്ടുമുമ്പുള്ള മണിക്കൂറുകളിലാണ് ഉല്‍ക്ക പതിക്കുക.

ടെലസ്‌കോപ്പില്ലാതെ നഗ്നനേത്രങ്ങള്‍കൊണ്ട് ദര്‍ശിക്കാമെങ്കിലും പ്രകാശത്തില്‍നിന്ന് അകലം പാലിക്കണം. അര്‍ധരാത്രി മുതല്‍ പുലര്‍ച്ചെവരെയുള്ള സമയത്ത് ഉല്‍ക്കപതിക്കുന്നത് കാണാം.

മണിക്കൂറില്‍ പത്തുമുതല്‍ ഇരുപതുവരെയും ചിലപ്പോള്‍ നൂറുവരെയും ഉല്‍ക്കകള്‍ വേഗത്തില്‍ മിന്നിമറയുന്നത് കാണാം. ഇവ ഭൂമിയിലേക്ക് കുത്തനെയാണ് വീഴുക.

ഭൗമോപരിതലത്തില്‍ എത്തുന്നതിന് മുമ്പേതന്നെ ഇവ വിഭജിക്കപ്പെടും. കണ്ണുചിമ്മുന്ന വേഗത്തിലാണ് ഇവ പതിക്കുന്നത്. ചന്ദ്രന്‍ അര്‍ധാകൃതിയിലായതിനാല്‍ നന്നായി ഉല്‍ക്കകളെ കാണാന്‍ കഴിയും. ഡിജിറ്റല്‍ ക്യാമറ ഉപയോഗിച്ച് ഫോട്ടോയെടുക്കാനും കഴിയും.

Tuesday, April 18, 2017

വെളിയങ്കോട് ഗ്രാമ പഞ്ചായത്തിൽ 'NRI HELP DESK' തുടങ്ങും : അദ്ധ്യക്ഷ പ്രേമജ സുധീർ



ദോഹ : ഹൃസ്വ സന്ദർശനാർത്ഥം ഖത്തറിൽ എത്തിയ വെളിയങ്കോട് ഗ്രാമ പഞ്ചായത്ത് അദ്ധ്യക്ഷ ശ്രീമതി പ്രേമജ സുധീറിന് ഖത്തർ വെളിയങ്കോട് മഹല്ല് റിലീഫ് കമ്മറ്റി സ്വീകരണം നല്‍കി.

QVMRC മെമ്പർമാരുടെ നിവേദന പ്രകാരം വെളിയങ്കോട് പഞ്ചായത്ത് ഓഫീസില്‍ പ്രവാസികള്‍ക്ക് വേണ്ടി ഒരു 'NRI HELP DESK' തുടങ്ങാം എന്ന് പ്രസിരണ്ട് യോഗത്തില്‍ ഉറപ്പ് നല്‍കുകയും ചെയ്തു.

'പ്രവാസി ക്ഷേമനിധികള്‍ നാം അറിയേണ്ടത്' എന്ന വിഷയത്തില്‍ അബ്ദുല്‍ റൌഫ് കൊണ്ടോട്ടി ക്ലാസ് എടുത്തു. റസല്‍ റസാക്ക് സ്വാഗതവും കാളിയത്ത് മുസ്തഫ അദ്ധ്യക്ഷതയും വഹിച്ച യോഗത്തിൽ നസീബ് വെളിയങ്കോട് നന്ദി പറഞ്ഞു.

Thursday, March 23, 2017

ഗിഫ മാധ്യമ അവാര്‍ഡുകള്‍ പ്രഖ്യാപിച്ചു



ദോഹ : ഗള്‍ഫിലെ മാധ്യമ പ്രവര്‍ത്തകരുടെ പുസ്തകങ്ങള്‍ക്കുള്ള ഗള്‍ഫ് ഇന്ത്യ ഫ്രണ്ട്ഷിപ്പ് അസോസിയേഷന്റെ പ്രഥമ ഗള്‍ഫ് മാധ്യമ അവാര്‍ഡുകള്‍ പ്രഖ്യാപിച്ചു.

സാദിഖ് കാവില്‍ (ഔട്ട് പാസ്) പി.പി ശശീന്ദ്രന്‍ (ഈന്തപ്പനച്ചോട്ടില്‍) കെ.എം അബ്ബാസ് (ദേര, കഥകള്‍) രമേശ് അരൂര്‍ (പരേതന്‍ താമസിക്കുന്ന വീട്) എം. അഷ്‌റഫ് (മല്‍ബു കഥകള്‍) ടി. സാലിം (ലോങ്പാസ്) എന്നിവരെയാണ് അവാര്‍ഡിന് തെരഞ്ഞെടുത്തതെന്ന് ഗിഫ ചെയര്‍മാന്‍ പ്രൊഫസര്‍ അബ്ദുല്‍ അലിയും ചീഫ് കോര്‍ഡിനേറ്റര്‍ അമാനുല്ല വടക്കാങ്ങരയും സംയുക്ത പ്രസ്താവനയില്‍ അറിയിച്ചു.

കാസര്‍കോട് സ്വദേശിയായ സാദിഖ് കാവില്‍ കഴിഞ്ഞ എട്ട് വര്‍ഷമായി മനോരമ ഓണ്‍ലൈന്‍ പത്രം ഗള്‍ഫ് റിപ്പോര്‍ട്ടറാണ്. മാധ്യമ പ്രവര്‍ത്തനത്തിനൊപ്പം ആനുകാലിക ലേഖനങ്ങളും കഥകളും കവിതകളും എഴുതാറുണ്ട് ഔട്ട്പാസ്(നോവല്‍), ജീവിതത്തിന്റെ നല്ലൊരു ഭാഗം (ഗള്‍ഫ് അനുഭവക്കുറിപ്പുകള്‍), കന്യപ്പാറയിലെ പെണ്‍കുട്ടി(നോവല്‍), പ്രിയ സുഹൃത്തിന്(കഥകള്‍) എന്നീ പുസ്തകങ്ങള്‍ പ്രസിദ്ധീകരിച്ചിട്ടുണ്ട്. ഗള്‍ഫ് പശ്ചാത്തലത്തില്‍ കുട്ടികള്‍ക്ക് വേണ്ടി രചിച്ച 'ഖുഷി' ഉടന്‍ പ്രസിദ്ധീകരണത്തിനൊരുങ്ങുന്ന സാദിഖിന്റെ പുസ്തകമാണ്.

മയ്യഴി പള്ളൂര്‍ സ്വദേശിയായ പി.പി ശശീന്ദ്രന്‍ ദുബൈയിലെ മാതൃഭൂമി ഗള്‍ഫ് എഡിഷന്റെ പ്രത്യേക പ്രതിനിധിയും ബ്യുറോ ചീഫുമാണ്. ജര്‍മന്‍ നോട്‌സ്, കോലത്തുനാട്ടിലൂടെ എന്നിവയാണ് പ്രധാന കൃതികള്‍, കേരള പത്രപ്രവര്‍ത്തക യൂണിയന്‍ സംസ്ഥാന പ്രസിഡന്റായും കേരള പ്രസ് അക്കാദമി വൈസ് ചെയര്‍മാനായും പ്രവര്‍ത്തിച്ച് ശശീന്ദ്രന്‍ ആറു തവണ കണ്ണൂര്‍ പ്രസ് ക്ലബ്ബ് പ്രസിഡന്റായിരുന്നു. സുഷയാണ് ഭാര്യ, തുഷാര, നന്ദ് കിഷോര്‍ എന്നിവര്‍ മക്കളാണ്.

കാസര്‍ഗോഡ് സ്വദേശിയായ കെ.എം. അബ്ബാസ് ഗള്‍ഫ് സിറാജിന്റെ എഡിറ്റര്‍ ഇന്‍ചാര്‍ജ്ജാണ്. ദേര, പലായനം (നോവല്‍) വാണിഭം, ഒട്ടകം, മൂന്നാമത്തെ നഗരം, ഷമാല്‍, സങ്കടബെഞ്ചില്‍ നിന്നുള്ള കാഴ്ചകള്‍ (കഥാ സമാഹാരങ്ങള്‍) സദ്ദാം ഹുസൈന്റെ അന്ത്യ നാളുകള്‍, മരുഭൂവിലെ ചിത്ര ശലഭങ്ങളുടെ ഓര്‍മയ്ക്ക്, ചരിത്ര വിഭ്രാന്തികള്‍ (ലേഖന സമാഹാരങ്ങള്‍) എന്നിവ അബ്ബാസിന്റെ പ്രധാന കൃതികളാണ്.

ആലപ്പുഴ ജില്ലയിലെ അരൂര്‍ പനക്കത്രച്ചിറയില്‍ സ്വദേശിയായ രമേശ് അരൂര്‍ ജിദ്ദയില്‍ നിന്നും പ്രസിദ്ധീകരിക്കുന്ന മലയാളം ന്യൂസ് ദിനപത്രത്തില്‍ കോളമിസ്റ്റും പത്രാധിപ സമിതി അംഗവുമാണ്. സാഹിത്യം, സിനിമ, ഗാനരചന എന്നീ മേഖലകളിലും അഭിരുചിയുള്ള രമേശ് വിവിധ ആനുകാലികങ്ങളിലും സാമൂഹ്യമാധ്യമങ്ങളിലുമായി നിരവധി രചനകള്‍ നിര്‍വ്വഹിച്ചിട്ടുണ്ട്. പരിസ്ഥിതിയുമായി ബന്ധപ്പെട്ട വിഷയമടക്കം രണ്ട് ഷോര്‍ട്ട് ഫിലിമുകളുടെ രചനയും സംവിധാനവും നിര്‍വ്വഹിച്ചു. രശ്മിയാണ് ഭാര്യ, നീരജ് ഏക മകനാണ്.

കണ്ണൂര്‍ ജില്ലയിലെ പയ്യന്നൂര്‍ കുഞ്ഞിമംഗലം സ്വദേശിയായ എം. അഷ്റഫ് 18 വര്‍ഷമായി ജിദ്ദയില്‍നിന്ന് പ്രസിദ്ധീകരിക്കുന്ന മലയാളം ന്യൂസ് ദിനപത്രത്തില്‍ പത്രാധിപ സമിതി അംഗമാണ്. കാസര്‍കോട് ഗവ. കോളേജില്‍നിന്ന് പി.ജി ബിരുദത്തിനുശേഷം മാധ്യമം ദിനപത്രത്തില്‍ പത്രപ്രവര്‍ത്തകനായി തുടക്കം. മല്‍ബു കേന്ദ്ര കഥാപാത്രമാക്കി പ്രവാസികളുടെ അനുഭവങ്ങള്‍ കഥകളാക്കി അവതരിപ്പിക്കുന്നതാണ് മല്‍ബു കഥകള്‍. വി. മുംതാസാണ് ഭാര്യ അമീന്‍ അഷ്റഫ്, അജ്മല്‍ അഷ്റഫ്, അഫ്ര ഫാത്തിമ എന്നിവര്‍ മക്കളാണ്.

കണ്ണൂര്‍ സ്വദേശിയായ ടി. സാലിം മലയാളം ന്യൂസിലെ സ്‌പോര്‍ട്‌സ് എഡിറ്ററാണ്. ഏഷ്യന്‍ ഗെയിംസ് ഉള്‍പ്പെടെയുളള പ്രധാന കായികമത്സരങ്ങള്‍ റിപ്പോര്‍ട്ട് ചെയ്ത സാലിം. 1999 ല്‍ മാധ്യമം ദിനപത്രത്തിലൂടെയാണ് പത്രപ്രവര്‍ത്തന രംഗത്തേക്ക് കടക്കുന്നത്. മാധ്യമത്തിന്റെ കോഴിക്കോട്, കൊച്ചി, തിരുവനന്തപുരം ഡെസ്‌കുകളില്‍ ജോലി ചെയ്തിട്ടുണ്ട്. ഷമീനയാണ് ഭാര്യ, നവീദ് ഉമര്‍, നിദാല്‍ സൈന്‍, നൈല മറിയം, നസീല്‍ റഹ്മാന്‍ എന്നിവര്‍ മക്കളാണ്.

പി.എസ്.എം.ഒ കോളേജ് മലയാള വകുപ്പ് മുന്‍ മേധാവി പ്രൊഫസര്‍ അലവി കുട്ടി, അരീക്കോട് സുല്ലമുസ്സലാമിലെ മലയാളം അസിസ്റ്റന്റ് പ്രൊഫസര്‍ ഡോ. അസ്ഗര്‍ അലി പി.എസ്.എം.ഒ കോളേജ് മലയാള വകുപ്പ് മേധാവി ഡോ. ബാബുരാജന്‍ എന്നിവരടങ്ങിയ ജൂറിയാണ് പുരസ്‌കാര ജേതാക്കളെ തെരഞ്ഞെടുത്തത്. 25000 രൂപയും പ്രശസ്തി പത്രവും ഫലകവുമടങ്ങുന്നതാണ് പുരസ്‌കാരം. 2017 മെയ് മാസം ദോഹയില്‍ വെച്ച് നടക്കുന്ന ചടങ്ങില്‍ അവാര്‍ഡുകള്‍ വിതരണം ചെയ്യും.

തൃശൂര്‍ സ്വദേശി വാഹനാപകടത്തില്‍ മരിച്ചു.



ദോഹ: തൃശൂര്‍ വലപ്പാട് സ്വദേശി പുതിയ വീട്ടില്‍ സുലൈമാന്‍ (46) വുഖൈറില്‍ വാഹനാപകടത്തില്‍ മരിച്ചു. സ്വന്തമായി നിര്‍മാണ കമ്പനി നടത്തിവരികയായിരുന്ന ഇദ്ദേഹത്തിന്റെ വുകൈറിലെ ജോലി സൈറ്റിൽ കാറ്റിലിരിക്കവേ ഇന്നലെ ഉച്ചയോടെ ട്രക്ക്‌ വന്നിടിക്കുകയായിരുന്നു.

റമളാനിൽ ദോഹയിലെ പ്രസിദ്ധ ഖാരി ആയ ശൈഖ് അബ്ദുറശീദ് സ്വൂഫിയുടെ സബ്ജി മസ്ജിദിൽ സ്ഥിര സാന്നിധ്യവും, നോമ്പ് തുറപ്പിക്കാനും മറ്റ് സേവനങ്ങൾക്കും ഓടിനടന്ന് കർമ്മനിരതനായിരുന്ന നല്ലൊരു വിശ്വാസിയായ ഈ എഞ്ചിനിയറെ പരിചയപ്പെട്ടവർ ഒരിക്കലും മറക്കാനിടയില്ല.

പരേതനായ അബ്ദുര്‍റഹ്മാന്റെയും ഖദീജയുടെയും മകനായ ഇദ്ദേഹത്തിന്റെ ഭാര്യ ജാസ്മിനും മക്കളായ സഫ്‌വാൻ, സിനാന്‍, സുഫ്‌യാന്‍ എന്നിവർക്കൊപ്പം അബൂ ഹമൂറിലെ സഫാരി മാളിനടത്തായിരുന്നു താമസം. മൃതദേഹം നാട്ടില്‍ കൊണ്ട് പോകുന്നതിനുള്ള നടപടി പുരോഗമിക്കുകയാണ്.